PARTURENA PARMINGGUON DI MINGGU XXIII DUNG TRINITATIS
PARTURENA PARMINGGUON
DI MINGGU XXIII DUNG TRINITATIS
& Ev: Pangungkapon 20 : 11 - 15 & Ep: Sepanya 1 : 1 - 7
TOPIK:
“PANGUHUMAN NA PARPUDI”
HURIA KRISTEN BATAK PROTESTAN (HKBP)
MINGGU, 23 NOVEMBER 2025
1.
MARENDE BE. HKBP No. 331 : 1 , 4 , 6 “SAI KRISTUS DO NGOLUNGKU” BL. 6
♫♪♫ Sai Kristus do ngolungku, lao mate untung do.
Tusi do lao rohangku, tusi masihol do.
♫♪♫ Di na homur matangku, sai ponjot hosangki.
Ndang puas be hatangku, sai ro ma Ho disi.
……[Musik]…… [Jongjong]
♫♪♫ Disi ale Tuhanhu padomu anakMon.
Huhut tu ingananMu togihon tondingkon.
2. Votum – Introitus – Tangiang :
U : Marhitehite Goar ni Debata Ama dohot Goar ni AnakNa, Tuhan Jesus Kristus dohot Goar ni Tondi Parbadia, na tumompa langit dohot tano on. Amen. Songon on do Hata ni Tuhan Jesus: Na monang i do parulosan dohot angka ulos na saksak, jala ndang sesaonKu goarna sian pustaha hangoluan, jala parhatopotonKu do goarna di jolo ni Damang dohot di jolo ni angka surusuruanNa . Haleluya!
H : (Mangendehon): Haleluya… Haleluya… Haleluya.
U : Martangiang ma hita! Ale Tuhan Jesus, Tuhan ni angka na mate dohot angka na mangolu. Ho do nampuna hami manang mangolu manang mate pe hami. Nang pe mardalan hami di rura nilinggoman ni hamatean, ndang huhabiari hami be hamatean, ai Ho do dongannami. Ndang tartiop hamatean manang tanoman be hami, ai Ho do Tuhannami naung humophop hami, jala Ho do nampuna hami. Ro hami nuaeng tu Ho mangido: sahat tu Ho ma tondinami dohot dagingnami, asa di Ho hami manang na mangolu manang na mate pe. Sai tiop ma tangannami, urupi hami marhitehite panghophopMi, asa sahat hami tu hangoluan na so ra suda. Amen. [Hundul]
3. MARENDE BE. HKBP No. 251 : 2 , 5 “NA MONANG I DO” BL. 138
♫♪♫ Na monang i ndang tupa hahuaon ni hamatean paduahon i.
Sai jongjong do ibana maradophon bohingKu di banuaginjang i.
Sai idaonna muse Tuhanna, ro di donganna na monang i.
:,:Ro di donganna na monang i.:,:
♫♪♫ Na monang i do na manjalo ulos na saksak di banua ginjang i.
Goarna i do na so jadi mosos sian pustaha hangoluan i.
TaringotanHu tu DebatangKu, sude donganHu na monang i.
:,:Sude donganHu na monang i.:,:
4. P a t i k :
U : Tangihon hamu (Tatangihon) ma Patik ni Debata, i ma sian Konfessi (Bindu 15). PARNINGOTAN DI NA MONDING
Tahaporseai jala tahatindanghon do:
Hamatean i, i ma ujung ni ngolu ni jolma di portibi on, maradian ma ibana sian sandok ulaonna. Adong haluaon di angka na porsea paboa Jesus Kristus naung hehe i do pangoluhon jolma i sian na mate, Ibana do Tuhan ni na mangolu dohot na mate.
Martua do na mate di bagasan Tuhan i na satia ro di ujungna. Dipatupa Huria i do parningotan di angka na monding laho padungohon haporseaonta marningot ajalta sandiri huhut padohothon panghirimon di hamonangan ni Kristus manaluhon hamatean songon i nang panghirimon di banua ginjang sambulon ni tondinta dohot di hadodomu ni na porsea i dohot Tuhan Debata sahat tu na ro Jesus Kristus paduahalihon.
Marhite poda on:
Taondolhon do panghirimon di haluaon ni jolma sian angka na mate di bagasan Jesus Kristus. Taalo do pingkiran na mandok boi na mangolu manjalo pasupasu sian na mate. Taalo do pingkiran na mandok paboa na adong pardomuan ni na mate dohot na mangolu, marhite tangiang (mendoakan arwah-arwah). Taalo do pingkiran na mandok ingkon pajongjong tugu laho pasangaphon na monding, dalan pangalapan pasupasu tu pinomparna.
Jala marhite poda on:
Tatulak do sude rumang ni na pinodahon ni ugamo hasipelebeguon lumobi poda taringot tu tondi na mandok: tading do tondi ni na mate i, jala tondi ni na mate i gabe begu dohot sumangot.
Di parningotan di na monding siparateatehononhon do mandok mauliate tu Debata di na marningot ulaon na denggan uju di ngoluna, alai ndang na mangigil pasupasu dohot tanda siarsiaran sian naung monding i.
I do sahatna. Antong, rap mangido gogo ma hita sian Tuhan Debata!
U+H: Ale Tuhan Debata! Sai pargogoi ma hami mangulahon na hombar tu PatikMi. Amen
5. MARENDE BE. HKBP No. 686 : 1 + 3 “RAMUN DO AU” BL. 686
♫♪♫ Ramun do au di joloMi, gok dosangki, urasi au.
O Jesus, Birubiru i; dison do au, patau ma au.
…… [Jongjong]……
♫♪♫ Ala denggan ni basaMi, ro au tu Ho, o Jesushi.
Parbadiai ma rohangki, dison do au, patau ma au.
6. Manopoti Dosa:
U: Tatopoti ma dosanta, martangiang ma hita!
Ale Tuhan Debata, Pargogo na so hatudosan jala Amanami ! Hujou hami do GoarMu na badia i, ala na targogot hami marningot dosanami. Sai marasi ni roha ma Ho mida hami on. O Tuhan Jesus Kristus, Anak ni Debata na gabe jolma ala ni hami, na mate jala na hehe sian na mate, na manaek tu banua ginjang do Ho mangondihon hami! Asi rohaM di hami, sai patongtong ma di hami roha hamauliateon tu Ho. O Tondi Parbadia, pangapul di na marsak roha, pamalum ma saluhut na bernit, binahen ni dosanami! Ro ma Ho mangingani hami, asa marlas ni roha hami mangulahon lomo ni rohaM. Ho do parhitean ni nasa asi ni roha, sai unang tulak hami. Sai tangihon ma hami, Ho ale Debata, Ama, Anak dohot Tondi Parbadia ! Amen.
Bagabaga ni Debata taringot tu hasesaan ni dosa!
Ise be mangaluhon angka na pinillit ni Debata ? Debata do na mamintori. Ise do na mandabu uhum hamagoan ? Kristus Jesus do naung mate; alai ndada holan i, naung mulak mangolu do, jala di siamun ni Debata do Ibana mangondihon hita. Hasangapon ma di Debata na di ginjang!
U+H: Amen. [Hundul]
7. MARENDE BE. HKBP No. 213 : 3 - 4 “DUNG SONANG ROHANGKU” BL. 115
♫♪♫ Diporsan Tuhanhu sandok dosangki, bolong tu na dao do dibaen.
Nang sada na so jujuronNa be i, na martua tondingku nuaeng.
Sonang do, sonang do; dipasonang tongtong rohangkon.
♫♪♫ Mangolu nang mate di Jesus do au, Ibana haporusanhi.
HataNa sambing do partogi di au, ai na tau haposanhu do i.
Sonang do, sonang do; dipasonang tongtong rohangkon.
8. E p i s t e l:
U : Tangihon hamu (Tatangihon) ma Hata ni Debata turpuk Epistel di Minggu sadari on, i ma sian Sepanya 1 : 1 - 7. On ma hata ni Jahowa na ro tu si Sepanya, anak ni si Husi, i ma anak ni si Gedalya, i ma anak ni si Amarya, i ma anak ni si Hiskia; uju di angka ari ni si Josia, anak ni si Ammon, raja sian Juda.
H : “RasiphononHu ma saluhut sian sisik ni tano on,” ninna Jahowa.
U : “RasiphononHu ma jolma dohot pinahan; rasiphononHu ma pidong angka na martongatonga langit dohot dengke angka na di bagasan laut, angka jolma parjahat rap dohot sibahen gasip; Ahu ma tongon maniaphon angka jolma i sian sisik ni tano on,” ninna Jahowa.
H : “PatoltolonHu ma tanganHu tu atas ni Juda dohot tu atas ni saluhut pangisi ni Jerusalem, jala siaphononHu sian inganan on pasipasi ni Baal, goar ni angka pangarunding rap dohot angka malim.
U : Ro di halak angka na marsomba tu parangan di langit di atas ni angka tarup angka na marsinggang, huhut marmangmang tu Jahowa huhut marmangmang tu Malkom.
H : Dohot angka na marbalik sian Jahowa, angka na so mangalului Jahowa, jala ndang marpanungkunan tu ibana.”
U : Hohom ma hamu maradophon Tuhan Jahowa! Ai jonok nama ari ni Jahowa! Ai nunga dipadiri Jahowa sada pelean sipotongon, nunga diparbadiai halak na pinioNa i. I do sahatna. Martua do angka na tumangihon Hata ni Debata, jala na umpeopsa. Amen.
9. MARENDE BE. HKBP No. 352 : 4 , 9 “SAI HEHE MA HAMUNA” BL. 156
♫♪♫ Tibu ma ro Ibana, i pe sai dungo ma.
Naung ro lumbalumbaNa, i pe tangihon ma.
Di buha siang ari lao ma na holom i.
Dung i satongkinnari tiur ma sasude.
…… [Jongjong] ……
♫♪♫ O Jesus las ni roha, sai ro ma Ho tibu.
Sigop ma au palua, ndang sonang au tutu.
Di tano paraloan, di hasiangan on.
Ho do dihalungunhon rohangku sai tongtong.
10. Manghatindanghon Haporseaon:
U : Tahatindanghon ma haporseaonta i, songon na hinatindanghon ni donganta sahaporseaon di sandok portibi on. Rap ma hita mandok:
H : Ahu porsea di Debata Jahowa…. d.u [Hundul]
11. KOOR :
12. TINGTING :
13. KOOR :
14. PARNINGOTAN DI ANGKA NAUNG MONDING
Pdt : Nuaeng, sahat ma hita tu parningotan ni angka naung monding sian tongatonga ni hurianta sataon parhuriaon ima sian 23 November 2024 sahat tu 23 November 2025. Marende ma hita!
H : (Marende) BE. HKBP No. 520 : 1 “PARTANGISAN DO HAPE” BL. 357
♫♪♫ Partangisan do hape anggo hasiangan on;
Holso, arsak, sahit pe, sai manosak do tongtong.
Ingkon songgop hamatean tu sudena jolma i;
Ai sude do na manean uhum ala dosa i.
Pdt : Hamu angka dongan sahaporseaon di bagasan Goar ni Tuhanta Jesus Kristus. Sadari on, ingotonta do angka donganta naung jumolo monding sian tongatonganta di bagasan sataon parhuria on. Ndang na mangarungkari lungun manang sidangolon hita nuaeng disi. Ai tapatupa pe parningotan di angka naung monding i, na paingothon hita do i, paboa hita pe monding do muse songon donganta naung monding i, jala tahaporseai do, ndada hamatean ujung ni pardalananta, tung dalan hangoluan do i. Songon nidok ni Apostel Paulus tu huria Korintus: ”Ai apala Tuhan i ma na tuat sogot sian banua ginjang, mardongan soara ni sintua ni surusuruan ni Debata, dohot mardongan sarune ni Debata, dung i, hehe ma jumolo angka na mate, angka na marhitehite Kristus”.
Angka on ma goar-goar ni ruas ni hurianta naung marujung ngolu di bagasan na sataon parhuriaon on: ( laos dijahahon ma goar goarna…)
------------
Nunga maradian nasida sian nasa ulaonna di portibi on. Alai nang pe ingkon ampe tu ganup jolma hamatean i, songon naung masa tu angka haholongan ni rohanta naung jumolo i. Dibagasan pangaramotion ni Debata do nang angka i saluhutna. Ai Kristus do Tuhan ni na mangolu dohot na mate.
H : Ingkon sude do jolma mamolus hamatean i. Ndang mardia imbar manang ise pe, na metmet nang na magodang, na mora nang na pogos, na sangap nang na lea, na gogo nang na gale.
Pdt : Didok di Pangungkapon 20:12 “Dung i huida ma angka naung mate i, angka na metmet nang angka na balga, jongjong di jolo ni habangsa i; jadi diungkap ma angka buku. Dung i diungkap ma sada buku na asing, i ma buku hangoluan, gabe diuhumi ma angka na mate i marguru tu na tarsurat di bagasan angka buku i, hombar tu na niulanasida be”
Porsea do hita, TUHAN i do na manjou hita muse asa masipaidaan di lambung ni Tuhanta, alani i rap jongjong ma hita huhut marende:
H : (Marende) BE. HKBP. No. 347 : 1 + 3 “SAI MASIPAIDAAN” BL. 11
♫♪♫ Sai masipaidaan do na porsea i.
Dung sahat be langkana, tu hasonangan i.
Tu hasonangan i, tu hasonangan i.
♫♪♫ Sai masipaidaan ma hita on muse.
Di lambung ni Tuhanta dung monang hita be.
Dung monang hita be, dung monang hita be.
Pdt : Antong tapuji ma Debata ala diparade di hita inganan na sonang, na andul ummuli jala dumenggan sian nasa na adong di hasiangan on, inganan na hot ro di saleleng ni lelengna. Amen. (Hundul)
15. MARENDE BE. HKBP No. 544 : 1... “MOLO RO PANJOU NI TUHAN” BL. 419 (Papungu Pelean Ia & Ib)
♫♪♫ Molo ro panjou ni Tuhan, molo salpu tingki on.
Molo binsar bintang sipaias i.
Jala sahat ma tu ginjang angka na tinobus i.
Dohot au dibaen Tuhanta lao tusi.
Molo jouon ni Tuhanta angka goar di pustaha.
Dibaen asi ni rohaNa, alusanhu: O Tuhanhu, au dison.
♫♪♫ Molo dapot tingki hehe angka na tinobus i.
Idaon nasida Tuhan Jesus i.
Di panghuling ni sarune lao manomu Tuhan i.
Dohot au dibaen Tuhanta lao tusi.
Molo jouon ni Tuhanta angka goar di pustaha.
Dibaen asi ni rohaNa, alusanhu: O Tuhanhu, au dison.
...... [Musik] ......
♫♪♫ Dibaen i o ale dongan ringgas be ma hita on.
Pararathon harajaonNa i tongtong.
Ai dung salpu tingki on na masuk be tu surgo i.
Dohot au dibaen Tuhanta lao tusi.
Molo jouon ni Tuhanta angka goar di pustaha.
Dibaen asi ni rohaNa, alusanhu: O Tuhanhu, au dison.
16. J a m i t a: Pangungkapon 20 : 11 - 15
17. MARENDE BE. HKBP No. 837 : 1… “SADA HUTA NA MANSAI ULI” BL. 837 (Papungu Pelean II)
♫♪♫ Sada huta na mansai uli, sambuloni tondinta do i
Bagas ni Debata Ama i, diparade di na monang i.
Sogot di surgo i, sai pajumpang do hita disi.
Sogot di surgo i, sai pajumpang do hita disi.
♫♪♫ Hita dohot donganta disan, rap marende mamuji Tuhan.
Ndang adong hasusaan disan, salelengna di surgo sonang.
Sogot di surgo i, sai pajumpang do hita disi.
Sogot di surgo i, sai pajumpang do hita disi.
...... [Musik] ......
♫♪♫ Debata Ama parholong i, sai pujion salelengna i.
Na marmuduhon ngolunta i, denggan basaNa sai hot do i.
Sogot di surgo i, sai pajumpang do hita disi.
Sogot di surgo i, sai pajumpang do hita disi. [Jongjong]
18. TANGIANG PANGUJUNGI: Tangiang Pelean – Tangiang Ale Amanami - Tangiang Pasupasu.
U : Tatangianghon ma peleanta. Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni HuriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.
H : Mangendehon: Nasa na nilehonMi tondi ro di pamatanghu
Hosa dohot gogongki ro di saluhut artangku
Hupasahat i tu Ho na so unsatonhu do
U : Ale Tuhan Debata, na sian nahinan jala na mangolu ro di saleleng ni lelengna! Huingot hami sadari on angka na mate sian hami, naung pajolohon tu lambungMu. Di Ho do anakhinsu ni banua ginjang, jala diungkap Ho do i di angka na mangasahon Tuhan Jesus Kristus. Na rungka do rohanami sadari on marningot ajalnami, dohot haheheon ni daging di ari sogot. Mauliate ma rohanami tu Ho, ala ditubuhon Ho hami tu panghirimon na mangolu, gabe partohap hami di hangoluan na so ra suda. Ndada na mandele hami di ari parningotan on, alai na malungun do hami di sambulo ni tondinami. Nunga torop dongannami naung nialapMu; tau sipaingot do ujung ni langkanasida di hami, bahen panghirimon mida Tuhan Jesus di ujung ni langkanami be. Sai sungguli ma rohanami mambahen tiruan na denggan di angka pinomparnami. Sai apuli ma na marsak roha dohot angka na matean, asa unang mangandungi jala mandele nasida. Sai taiti ma rohanasida mamereng dompak ginjang. Sai lehon TondiM tu hami asa tangkas dihatindanghon tu hami, naung dohot do hami anakMu jala panean di arta na di banua ginjang. Sai padao ma ganggu ni roha sian hami, asa hot haporseaonnami maniop Tuhan Jesus Sipangolu i, andorang hubolus hami rura linggoman ni hamatean i. Molo homur matanami be, ungkap ma mata ni rohanami asa tangkas niida dalan tu hasonangan i. Molo hallang dilanami, so binoto be manghuling, pargogoi ma hami marhitehite TondiMi, asa tarjouhon hami: Ale Amang! Sahat tu tanganMu ma tondingku! Sai patiur hian rohanami, asa hobas langkanami jala sonang hami laho mate di bagasan Tuhan Jesus Kristus, Tuhannami. Amen.
Ale Amanami na di banua ginjang! Sai pinarbadia ma GoarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!
H : Mangendehon: Ai Ho do nampuna harajaon dohot hagogoon
Ro di hasangapon saleleng ni lelengna Amen
U : Tangiang Pasupasu.
H : Mangendehon: Amen Amen Amen
Komentar
Posting Komentar