PARTURE NI PARMINGGUON MINGGU XV DUNG TRINITATIS 28 September 2025 (Minggu Ekologi HKBP)

   

 

 

 

 

 

 

 

 

 

 

PARTURE NI PARMINGGUON

MINGGU XV DUNG TRINITATIS

                              (Minggu Ekologi HKBP)

 

 

& Ev:  Kolosse 1 : 15 - 20             & Ep: Psalmen 148 : 1 - 14

 

TOPIK:

SUDE DITOMPA MARHITE KRISTUS

 

HURIA KRISTEN BATAK PROTESTAN (HKBP)

Minggu, 28 September 2025

1. Marende BE. HKBP No. 192 : 1 - 3  “O TUHAN JESUS RAJA NI SUDENA”  BL. 60

          ^♫♪♫ O Tuhan Jesus Raja ni sudena tubu sian Ama i

             Haholonganku,  Sisombaonku, sasada Ho do Tuhanhi

 

         ^♫♪♫ Tombak denggan do hauma pe dengan do na rumatarata i

            Jesus dumenggan Jesus gumodang, sibaen las ni rohanta i.

                        ------   Jongjong ------

        ^♫♪♫  Bulan tiur do bintang pe torang do, nang mata ni ari pe

       Jesus tumiur, Jesus tumorang, sumurung sian i sude

 

2. Votum – Introitus – Tangiang:  

U : Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia na tumompa langit dohot tano on. Amen. Pinuji ma Debata Sitompa langit dohot tano on! TanganNa do na jumadihon nasa na tinompa. Hatiuron dialithon Ibana hira ulos, Ibana pahembangkon angka langit songon rimberimbe. Ibana manggulanggulangi di angka aek bilutNa parginjang; huretaNa do dibahen angka ombun i, mardalandalan do Ibana di atas habong ni alogo. Nunga dipaojak Ibana tano on tu angka ojahanna i, asa unang lalolalo salelenglelengna. Halomohon Jahowa, jadi lehononNa ma tu ho na pinangido ni roham. Pasahat ma dalanmu tu Jahowa jala haposi Ibana, asa Ibana paturehon. Haleluya!

 

H : (Mangendehon): ^♫♪♫Haleluya… Haleluya… Haleluya.

 

U : Martangiang ma hita! Ale Tuhan Debata, Amanami Parasiroha na sumurung! Mansai denggan do ditompa Ho langit dohot tano dohot nasa isina, jala ndang hea ditadinghon Ho ulaon ni tanganMu. Pinuji ma GoarMu salelengnilelengna. Ala balga ni holongMu marhite Kristus, AnakMi, nunga dibahen Ho padan tu saluhut na tinompaMi, jala ndang hea diose Ho padan naung binahenMi. Gok denggan ni basaM do langit dohot tano on, ale Amang. Mulak rata do asi ni rohaM jala ndang marpansohotan denggan ni basaM.

Rap dohot nasa na tinompaM hupuji hami ma Ho ale Debata Ama, Anak dohot Tondi Parbadia. Sadari on dipatupa Huriam HKBP do Minggu Ekologi manang minggu hasadaon ni nasa na tinompa. Pauba ma andung dohot angguknami gabe pujipujian tu Ho, ale Amang. Pahisar ma tano naung tinompaMi, naung sega ala haginjangon ni roha dohot hamongkuson ni jolma i, marhite panghophopon ni Jesus Kristus, AnakMi di hau pinarsilang i. Sai bahen ma hami saluhutna gabe jolma na tinompa na imbaru marhite Tondi Parbadia. Amen.

                                                   (Hundul)

3. Marende BE No. 781 : 1 + 3 “SAI HALASHON NA TINOMPA” BL. 781

          ^♫♪♫ Sai halashon na tinompa ni Tuhanta Debata

             Sunge, laut, dohot tombak ro di parlangitan i, ro diparlangitan i.

 

          ^♫♪♫ Saluhut na natinompa, pasangaphon Debata,

            Au pe dohot do mamuji, pasangaphon goarNa i, pasangaphon goarNa i.

 

4. P a t i k :

U : Tangihon hamu (Tatangihon) ma Patik ni Debata di Minggu sadari on, i ma na nienet sian Konfessi HKBP taon 1996 bindu 5, taringot tu Lingkungan Hidup:

Tahaporseai jala tahatindanghon do:

       Ditompa Debata do jolma nang inganan parmianan dohot inganan pangulaonna di portibi on (1 Musa 2:5-15). Ibana do nampuna sude, na mangalehon hangoluan tu sude na tinompaNa i. Inganan pangulaon ni jolma i ma darat, laut dohot hajanghajang (langit, ruang angkasa). Dilehon Debata do huaso tu jolma i laho paulihon portibi on di bagasan tanggung jawab na gok. Ulaon ni Jesus Kristus do paluahon jolma i, nasa na tinompa i songon i portibi on sandiri (Kol 1:15-20, Rom 8:19-33).

       

Marhite on: Tahatindanghon do tanggung jawab ni jolma pangoluhon (melestarikan) sude na tinompa ni Debata asa boi ibana mangula, hipas dohot marsonang (sejahtera) (Psalmen 8:4-10).

       

Taalo do angka usaho na manegai lingkungan marhite na manutungi dohot manabai hau di tombak manang harangan (5 Musa 5:20, 19-20). Taalo do angka usaho na mangalitohi aek dohot auangauang (udara), nang aek panirisan (limbah) na marisi rasun sian angka pabrik marhite so manganturehon halalao ni aek panirisan i pola tahe menegai aek siinumon, suang songon i taalo do angka pencemaran udara na manegai  parhosaan ni jolma. (paheba Psalm 104:1-23, Pangungkapon 22:1-2).

       

Antong rap mangido gogo ma hita sian Tuhan Debata laho mangulahon na hombar tu PatikNa i.

 

U+H : Ale Tuhan Debata sai pargogoi ma hami mangulahon na hombar tu PatikMi. Amen.

 

5. Marende BE. HKBP No. 174 : 3 - 4 “TOROP DOPE NA SIAT I” BL. 184

          ^♫♪♫ Pardosa ho didok roham, na so tama be dohot?

          Ndang pola ala ni dosam, umbaen na sundat bongot.

          Ai nunga sae do dosami, digarar Tuhan Jesus i

          Naung sae, naung sae, naung sae do dosami.

                      ------  (Jongjong) ------

        

 

          ^♫♪♫ Haporseai ma hata i, ai i do haluaon

          Haposi Tuhan Jesus i, mudarNa i ma golom

          Ai nang  gok dosa  rohami, malua ho bahenon nii

          Tutu, tutu malua baenon nii.

 

6. Manopoti Dosa: 

U : Tatopoti ma dosanta, martangiang ma hita! Ale Tuhan Debata, Amanami, Sitompa saluhut. Uli do ditompa Ho tano on nang sude pangisina. Alai nunga godang na sega angka tombak, sunge, tao dohot laut hinorhon ni dosanami jolma na manghorhon ragam ni parmaraan nang sahit tu jolma nang luhut na tinompaMi. Asi ma roham di hami, sai sesa ma nasa dosanami jala pargogoi ma hami manghangoluhon lomo ni rohaM. Sai panghulingi ma nang angka pamarenta ni angka negara di liat portibi on, asa nang nasida saurdot dohot Ho, parsidohot pauliulihon na tinompaMi. Amen

 

Bagabaga ni Debata taringot tu hasesaan ni dosa!

       Songon on do Hata ni Tuhan Jahowa: Nunga diarsahi Ho Ahu marhite sian angka dosam, jala nunga dilojai ho Ahu marhite sian angka hajahatonmu. Ahu tutu, Ahu sandiri manalesei angka pangalaosim ala ni hadirionKu, jala ndang be Hupaingotingot angka dosam. Hasangapon ma di Debata na di ginjang.

U+H : Amen.         

                                                         (Hundul)

 

7. Marende BE. HKBP No. 569 : 1 – 2  “O DEBATA TUNG LONGANG DO ROHANGKU”  BL. 569

          ^♫♪♫ O Debata tung longang do rohangku, molo hubereng na tinompaMi.

             Saluhut bintang, hilap dohot ronggur, manghatindanghon hasangaponMi.

             Marende au Tuhan mamuji Ho, o Debata, sangap do Ho.

             Marende au Tuhan mamuji Ho, o Debata, sangap do Ho.

 

      ^♫♪♫ Di ladang di adaran dohot tombak, marende pidong tung mansai sonang.

            Punsu ni dolok, sunge dohot rura, mamaritahon sangapMi Tuhan.

            Marende au Tuhan mamuji Ho, o Debata, sangap do Ho.

            Marende au Tuhan mamuji Ho, o Debata, sangap do Ho.

8. E p i s t e l:

U : Tangihon hamu (Tatangihon) ma Hata ni Debata turpuk Epistel di Minggu on, tarsurat  di Psalmen 148 : 1 - 14, Halleluya! Puji ma Jahowa, hamu ale angka sian banua ginjang, puji hamu Ibana di angka banua ginjang!

H : Puji Ibana, sude hamu ale angka surusuruanNa, puji Ibana, sude hamu ale angka paranganNa!

U : Puji Ibana, ho ale mata ni ari dohot bulan, puji Ibana, sude hamu ale bintang angka na marsinondang i!

H : Puji Ibana, hamu ale angka langit ni langitan dohot hamu ale aek angka na di atas ni langit!

U : Ingkon pujionnasida ma goar ni Jahowa, ai mandokhon Ibana, jadi tartompa ma nasida.

H : Jala Ibana pahot angka nasida ro di salelenglelengna, dibahen do sada aturan jala ndang halaosansa.

U : Puji ma Jahowa, hamu ale angka sian tano on, angka binatang ni laut ro di sude angka lung!

H : Ho ale api dohot ambolas ro di timus, habahaba, na pasauthon hatana i.

U : Hamu ale angka dolok dohot sude angka robean, hamu ale hau angka na marparbue ro di sude hau ares.

H : Ho ale binatang dohot sude pahanpahanan, angka gulomit ro di angka pidong na marhabong.

U : Hamu ale angka raja ni tano on dohot sude angka bangso, hamu ale angka pangarajai ro di sude angka panguhum ni tano on.

H : Hamu ale angka dolidoli dohot namarbaju pe, hamu ale angka natuatua rap dohot angka na bajar.

U : Ingkon pujionnasida ma goar ni Jahowa, ai sasada goarNa i do na timbul, diatasi hamuliaonNa i do tano on dohot angka langit.

H : Jala Ibana patimbul sada tanduk di bangsoNa i, bahen pujipujian di sude angka na niasianNa, di angka anak ni Israel, bangso hasolhotonNa i. Halleluya!

U : I do sahatna. Martua do angka na tumangihon Hata ni Debata jala na umpeopsa.

U+ H: Amen.

 

 

 

9. Marende BE. HKBP No. 774 : 1+4 “TUNG MABAOR SIAN HO”     BL. 774                                                                 

       ^♫♪♫ Tung mabaor sian Ho, mual hangoluan i.

             Ai torop pe batang aek angka dolok dohot rura.

             Nang pe langit dohot tano, Ho do na manompa i;

             Ho do na manompa i, Ho do na manompa i, Ho do manompa i. 

                          ------ Jongjong ------

         ^♫♪♫  Huhilala holongMi na manogu rohangki.

            Unang loas au be lilu, manadinghon Ho Tuhanhu.

            Pandang i do tujuohu, saleleng di ngolungki. 

            Saleleng di ngolungki, saleleng di ngolungki, saleleng di ngolungki.

 

10. Manghatindanghon Haporseaon:

U : Tahatindanghon ma haporseaonta i, songon na hinatindanghon ni donganta sahaporseaon di sandok portibi on. Rap ma hita mandok!

H : Ahu porsea di Debata Jahowa…. d.u         (Hundul)

 

11.  K O O R

 

12. TINGTING:

 

13.  K O O R

14. Papungu Pelean Huhut Marende BE No. 116 : 1 - 4 “DITOMPA HO DO AU”  BL. 243                                                               (Pelean Ia & Ib)

          ^♫♪♫ Di tompa Ho do au, sondangi rohangkon;

             Tung basa-basaMi sude na di au on.

             Gomgomi pamatangku, naeng Ho do oloanhu.

             Sai lehon ma gogongku, lomoM naeng ulaonhu.

             Urupi tatap au tutu, Panompa na burju.

 

         ^♫♪♫ Tuhan Sihophop au, sai buri tondingkon.

             Marhite mudarMi torusi ngolungkon.

             Pinuji ma GoarMu, arga ma panghophopMu;

       Dibaen pangalahongku, nang nasa ulaonhu.

       O Jesus Sipalua au, tu Ho ma au patau.

 

 

                        ------Musik-------

       ^♫♪♫  Tu TondiMi Tuhan  hulehon diringkon

            Sai tong ma dirajai sandok pamatanghon

            Ibana hutangihon, sai saut au ditogihon.

            Tu ngolu partondion, manahan di ujian.

            O Tondi Parbadia i, sai Ho ma Rajangki.

 

       ^♫♪♫  Ale Debatangki Sitolusada i

            Bongoti rohangki parbadiai ma i

            Sai Ho ma lam hutanda gogongku lam paganda  

            Manangkup  haluaon, maniop hatuaon

            Ni Ama,Anak,Tondi i  na tong pujion i.

                             ------Musik-------

 

15. J a m i t a:  Kolosse 1 : 15 - 20

 

16. Papungu Pelean Huhut Marende BE No. 783 : 1 - 9 “TUHAN SITOMPA SALUHUT”  BL. 783                                                         (Pelean II)

          ^♫♪♫ Tuhan sitompa saluhut, Ho do na marmulia i.

             Ndang na tarasam saluhut nilehonMi.

                   

        ^♫♪♫ Patar do asi rohaMi di sinondang ni ari i.

           Di gogo ni hauma i, nilehonMi.

                        ------Musik-------

          ^♫♪♫ Mauliate o Tuhan di ruma tangga na sonang.

             Godang do pasupasu i, nilehonMi.

            

      ^♫♪♫ Ditongos Ho do AnakMi laho manobus jolma i.

            Ndang tarasam asiMi nilehonMi.

                              ------Musik-------

          ^♫♪♫ Dilehon Ho do TondiMi ro di sude na ringkot i,

             Holong, huaso, ngoluMi nilehonMi.

             

      ^♫♪♫ Ndang tarbalos burjuMi disesa Ho do dosa i.

            Togu do panghirimon i nilehonMi.

                        ------Musik-------

         ^♫♪♫ Salpu do arta tano i, sada do na manongtong i.

            Banua ginjang hot do i nilehonMi.

       ^♫♪♫ Luhut peleannami on Ho do haroroan ni i.

             Pelean na jinangkonMon nilehonMi.

                        ------Musik-------

         ^♫♪♫ Jalo ma sombanami on dohot pamuji nami i.

            Arta nang ngolu nami on nilehonMi.

 

17. Tangiang Pangujungi: Pelean – Tangiang Ale Amanami - Tangiang Pasupasu:   (Jongjong )

U : Tatangianghon ma peleanta. Ale Debata, Amanami na di banua ginjang! Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni HuriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.

H : (Mangendehon)       

^♫♪♫  Nasa na nilehonMi, tondi ro di pamatanghu

                    Hosa dohot gogongki, ro di saluhut artangku

                    Hupasahat i tu Ho, na so unsatonhu do.

       

U : Ale Amanami na di banua ginjang! Sai pinarbadia ma GoarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

H : (Mangendehon)

^♫♪♫  Ai Ho do nampuna harajaon, dohot hagogoon

Ro di hasangapon, saleleng ni lelengna, Amen

 

U : Tangiang Pasupasu. 

 

H : (Mangendehon )

^♫♪♫Amen, Amen, Amen.